有冇人同小編一樣，每次去旅行都會雞手鴨腳，成日都唔記得有啲咩要Hand Carry，有邊啲要托運，加上搭飛機嘅政策經常會變，有時自己搞錯咗都唔知。呢篇文章為大家整理一下2023最新相關資訊，以後去旅行就可以對住嚟執喇！
由於行動電源放喺貨艙內有機會短路，所以一定要隨身攜帶登機，其他電子產品如相機、電話、手提電腦等等，都一定要放喺手提行李隨身攜帶上機。如果有後備電池的話，可以帶埋電池保護盒、貼絕緣膠帶等，保護電池。
有需要帶打火機的話，記得一定要隨身攜帶，每人只可以帶一個打火機，但係噴氣式嘅打火機係絕對唔可以攜帶登機。
所有可以被視為攻擊性武器嘅物品，包括槍械、玩具槍、弓箭、剃刀、美工刀、軍刀、電鋸、電鑽、棒球棍、武術器材等等全部都唔可以放入手提行李內，一定要放入寄艙行李。
液體往往係最麻煩，每次都最易漏嘅類別。要留意100 ml以下嘅液體、膠狀及噴霧類物品都可以隨身帶上飛機，但要裝晒喺一個不超過1公升大小，且可重複密封嘅透明塑膠夾鏈袋入面，每名旅客只可帶一個裝有容器嘅塑膠袋（20 x 20 cm），總共不得超過 1,000 ml﹐過安檢時要放喺置物籃單獨過X光機檢查。留意每一個容器嘅容量都唔可以大於100毫升，就算未裝滿液體、凝膠或噴霧類物品，容器太大亦都不會接納。
不過，如果係有需要嘅藥物、嬰兒奶粉／食品及特別飲食所需嘅液體，記得事先申報，安檢人員經查證後同意都可獲豁免。
至於有啲咩係絕對唔可以帶上飛機，答案係所有危險物品，包括爆炸物及可燃物質和其他部件、槍支、火器及眩暈裝置、化學物質、附有尖角或銳邊的物品及可發射射彈的裝置、工具、鈍器等等。
如果大家仲有疑惑的話，可以上民航處官網了解一下：https://www.cad.gov.hk/chinese/packing_tips.html#baggage
